Parmalat het geen likiditeitsprobleme nie en boere wat aan die maatskappy melk lewer kan seker wees dat hulle aan die einde van die maand hulle tjeks sal kry. Dié versekering is deur mnr. Nick Wentzel, bedryfshoof van Parmalat, gegee toe hy verlede week in Port Elizabeth ‘n ledesaamtrek toegespreek het.
Wentzel, wat nou vier maande sy pos beklee, het gesê hy volg ‘n oop deur-beleid. “Al verskil ons, moet boere die vrymoedigheid hê om enige probleme wat hulle het onder ons aandag te bring. Ons mag nie altyd die antwoorde hê wat hulle wil hoor nie, maar sal altyd eerlik wees. Ons is almal vennote in die waardeketting en daarom is kommunikasie met beide produsente en kliënte van deurslaggewende belang om ‘n wen-wen-uitkoms te verseker.”
Wentzel het aan Landbouweekblad gesê dat daar sedert sy aanstelling goeie vordering gemaak is met die herstruktureringsproses om die maatskappy se kostes te verminder en personeel uit diens te stel.
Die seisoenaliteit waarmee melk geproduseer word, is ‘n groot knelpunt aangesien daar gedurende sekere tye van die jaar oorskotte of tekorte aan melk is. Die kuns is om die voorraad só te bestuur om nie met groot voorrade verwerkte suiwelprodukte in pakhuise opgeskeep te sit nie.
Hy verwag twee goeie jare vir die bedryf en dat die dalende rentekoers tot ‘n toename in verbruik sal lei. “Ongelukkig bly gesubsidieerde suiwelinvoere ‘n moontlike probleem wat fyn dopgehou moet word.”
1 September 2009
