Terwyl Amerika se uitvoere van landboutoerusting na die meeste wêrelddele in 2013 gedaal het, het dié land se uitvoersyfer na Afrika feitlik dieselfde gebly.
Volgens die Association of Equipment Manufacturers (AEM), wat internasionale vervaardigers en verspreiders van landboumasjinerie verteenwoordig, het Amerikaanse uitvoere van $12 miljard na ander wêreldmarkte in 2013 met 6% afgeneem teenoor die syfer vir 2012.
Wat hierdie daling van 6% vir 2013 soveel merkwaardiger maak, is dat dit volg op ’n groeifase in uitvoere van 12% in 2010, ’n stewige 23% in 2011 én toe weer 16% in 2012.
Vergeleke met die 2012-uitvoersyfers lyk die prentjie vir die VSA se 2013-uitvoere soos volg:
Uitvoere na Suid-Amerika het met 18% afgeneem tot $1,2 miljard terwyl die uitvoere na Sentraal-Amerika met 1% gegroei het tot $1,2 miljard.
Die uitvoere na Europa het met 14% gedaal tot $2,8 miljard terwyl die uitvoere na Astralië/Oseanië met 26% afgeneem het tot $912 miljoen.
Die uitvoere na Asië het met 5% gegroei tot $1,2 miljard.
Die uitvoere na Kanada het met 6% toegeneem met tot $4,3 miljard, terwyl die uitvoere na die Afrika-vasteland baie stabiel gebly het met ’n geringe afname van 0,5% tot $442 miljoen.
Die beste uitvoerbestemmings vir landboumasjinerie uit die VSA was in 2013 Kanada ($4,3 miljard - 6%); Mexiko ($988 miljoen - 3%); Australië ($822 miljoen - 28%); Brasilië ($517 miljoen - 29%); China ($491 miljoen - 5%); Duitsland ($470 miljoen - 5%); Frankryk ($344 miljoen - 7%); Suid-Afrika ($303 miljoen - 4%); Rusland ($303 miljoen - 9%) en die Oekraïne ($269 - 30%).
