Dié reg is verkry danksy ’n memorandum van verstandhouding wat op 8 Januarie in San Juan, Puerto Rico, deur die American Farm Bureau Federation (AFBF) en John Deere onderteken is.
Die memorandum het die potensiaal om as model te dien vir ooreenkomste met ander vervaardigers van landboumasjinerie. AFBF het reeds sulke gesprekke begin voer, sê dié landbou-organisasie in ’n verklaring op sy webwerf.
Landboumasjinerie soos stropers of trekkers gebruik deesdae op gevorderde tegnologie soos GPS-stelsels wat met slim- of raakskerms in die kajuit beheer word en dus op rekenaarsagteware staatmaak. Maatskappye word genoodsaak om hul intellektuele eiendomsreg wat hulle in staat stel om dié sagteware te ontwikkel, te beskerm teen goedkoop namaaksels -- of om reuse- finansiële skade te ly. As deel van dié beskerming vereis landboumaatskappye in die meeste gevalle dat kliënte slegs van hul geakkrediteerde verskaffers en herstellers gebruik maak.
Maar die reg om self toerusting te mag herstel pleks daarvan om slegs die maatskappy wat dit verkoop, se hersteldienste te gebruik, is ’n kwessie wat al die afgelope jare op internasionale vlak binne en buite landboukringe gedebatteer word. Belangegroepe wat verbruikers se regte beskerm, vra al jare lank dat maatskappye hul klante toelaat om self enigiets van trekkers tot slimfone te herstel.
In antwoord op dié druk het Apple verlede jaar ’n plan ingestel waarvolgens onafhanklike herstellers Apple-toestelle mag herstel. Brittanje en die Europese Unie het beleid wat vervaardigers dwing om onderdele vir sommige elektroniese toerusting aan klante en onafhanklike maatskappye beskikbaar te stel.
Beskerming
Die ooreenkoms wat nou tussen die Amerikaanse boere se grootste belangegroep en John Deere beding is, is juis daarop gemik om die maatskappy se sagteware te beskerm, maar terselfdertyd ’n meganisme te skep om boere se besware oor die koste-implikasies aan te pak as hulle gekeer word om self herstelwerk te doen waar hulle kan.
“Ek is verheug om dié ooreenkoms met John Deere te onderteken, wat sal verseker dat ons as boere ons eie toerusting kan herstel en toegang tot die diagnostiese gereedskap en inligting te hê wat ons nodig het, terwyl dit John Deere se intellektuele eiendomsreg beskerm en die veiligheid van toerusting verseker,” sê mnr. Zippy Duvall, president van die AFBF.
Hy sê in sy verklaring dat enige landboutoerusting wat boere aankoop, ’n groot belegging is en dat boere die vryheid moet hê om self te kies waar die toerusting herstel word, of om dit self te herstel om koste te beheer sodat hulle die voedsel, brandstof en vesel kan verbou waarop Amerikaanse huishoudings staatmaak.
Duvall het bygevoeg dat sy organisasie gereeld met John Deere sal vergader om kwessies aan te pak. Die ooreenkoms formaliseer boere se toegang tot diagnostiese en herstelkodes, handleidings en produkgidse. Dit verseker volgens die AFBF se verklaring ook dat boere diagnostiese gereedskap direk vanaf John Deere kan koop en hulp van die vervaardiger sal ontvang wanneer hulle onderdele en produkte bestel.
Mnr. David Gilmore, John Deere se senior visepresident van landbouverkope en bemarking, sê die ooreenkoms herbevestig sy maatskappy se jare lange verbintenis daartoe dat sy kliënte die diagnostiese gereedskap en inligting het wat hulle benodig om herstelwerk aan hul masjinerie te doen. “Ons sien uit daarna om saam met die AFBF en ons klante te werk sodat hulle die hulpbronne tot hul beskikking het om hul toerusting te onderhou en te herstel.”
Ingevolge die ooreenkoms mag eienaars wat hul John Deere-toerusting self herstel of onafhanklike tegnici nie enige veiligheidseienskappe van die toerusting omverwerp of buite werking stel nie, of enige maatreëls systap wat vrystellings beheer nie. Hulle mag ook nie handelsgeheime oor die toerusting bekend maak nie, berig die BBC.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
