Mnr. Phillip Warren, ’n 77-jarige boer wat spog met die grootste versameling Ford-trekkers in Brittanje, sal binnekort bykans sy hele versameling verkoop.
Volgens Autoevolution.com het Warren, wie se plaas Middlecott in Beaworthy, Devon, geleë is, sy eerste trekker in 1989 gekoop. Sedertdien het sy passie vir Ford-trekkers al hoe groter geword. Hy het nou meer as 80 van dié trekkers.
Die versameling sluit onder meer 35 Ford 4000-trekkers, meer as 30 Ford 3000s-trekkers, sowat 10 Ford 5000-trekkers, twee Ford 13-6-grawers en ’n vierwielaangedrewe Ford 7810 in. Sy hele versameling is met 622 nuwe batterye toegerus vir wanneer dit op 4 September opgeveil word.
Kivells-afslaers, wat die veiling behartig, het aan Autoevolution.com gesê dit is die grootste veiling van sy aard in meer as ’n dekade aangesien dit ongewoon is om so ’n versameling van ’n enkele verkoper te ontvang.
Warren het volgens calstock-today.co.uk besluit om sy versameling te verkoop ná hy vroeër vanjaar ’n hartaanval gehad het. Hy wil graag self van die trekkers ontslae raak omdat dit volgens hom onregverdig sou wees om dié taak aan sy drie dogters oor te laat as hy sterf.
Warren woon alleen op die plaas. Sy vrou is twee jaar gelede oorlede.
