Trekkerverkope in Suid-Afrika het tot dusver vanjaar behoorlik wipplank gery, met die aantal eenhede wat verlede maand verkoop is, wat na 551 verlaag het – nadat meer as 900 eenhede in Oktober vanjaar verkoop is. Op ’n jaargrondslag is die verskil in verkope marginaal minder, met 554 eenhede wat verlede jaar November aangeteken is.
Die Suid-Afrikaanse Landboumasjinerie-vereniging (Saama) sê in 'n verklaring tot dusver vanjaar is verkope 5% laer vergeleke met 2012. Daarteenoor is stroperverkope vir vanjaar, vergeleke met 2012, 4% hoër. Die aantal eenhede wat verlede maand verkoop is, is wel drie minder as die 15 wat in dieselfde maand verlede jaar verkoop is.
Bedryf voor moeilike seisoen
Die droogtetoestande wat tans oor groot dele van die land heers, oefen ook druk op dié mark uit. “Die onlangse skerp daling in die waarde van die rand, veroorsaak kommer in dié mark. Verskeie kommentators binne die bedryf meld dat die bedryf voor ’n moeilike seisoen staan,” aldus die verklaring.
In die meeste oostelike gebiede waar somergewasse verbou word, het boere klaar geplant en het redelike goeie opvolgreën geval. In sekere van die westelike dele van die land het goeie reën ook al geval, wat boere in staat gestel het om te kan begin plant. “Ongelukkig is sekere van die westelike dele van die land steeds droog.”
Die bedryf voorspel dat trekkerverkope vir die 2013-kalenderjaar sowat 7500 eenhede gaan wees, wat 5% laer is as 2012 se totale verkope.
