Ná die aanvanklike bekendstelling van Mahindra se reeks trekkers in Suid-Afrika gedurende Mei 2019 het die wêreld se grootste trekkervervaardiger per volume die volgende stap gedoen om die verspreiding en onderhoud van al sy trekkers en werktuie self te behartig.
Mnr. Rajesh Gupta, uitvoerende hoof van Mahindra Suid-Afrika, sê die maatskappy het besluit om die volle reeks Mahindra-trekkers en -werktuie deur ’n netwerk handelaars met tegniese en kliëntediensondersteuning te versprei. Die handelaars sal ondersteun word deur die maatskappy se hoofkantoor en onderdeleverspreidingsentrum in Gauteng.
“Ná die eerste twee en ’n half jaar in Suid-Afrika, waartydens Mahindra met herverkopers in vennootskap getree het om ’n teenwoordigheid vir ons trekkers en werktuie in die belangrikste landbougebiede te vestig, het ons ’n sterk groei in aanvraag na ons reeks trekkers en ander toerusting gesien. Gegewe ons plan om Suid-Afrika as Mahindra se tweede tuiste buite Indië te vestig, het ons dus besluit om volle beheer van ons landbou-afdeling hier te neem.”
Hy sê Mahindra het in die verlede op ’n derde party staatgemaak het vir die verkope, diens en ondersteuning aan boere, maar die maatskappy sal dit nou direk doen. Dit strook met Mahindra se visie om hom as ’n huishoudelike naam in Suider-Afrika te vestig.
Mahindra het homself reeds gevestig as gewilde landboumasjinerievervaardiger in Amerika en Australië, markte wat, so glo Gupta, ’n spieëlbeeld is van die plaaslike mark. “Die reeks Mahindra-landboutoerusting is reeds as betroubaar en gewild in verskeie moeilike omgewings reg oor die wêreld bewys. Dit is ook plaaslik die geval. Trekkereienaars is tevrede met die duursaamheid, onderhoudsgemak en brandstofgebruiksdoeltreffendheid van ons masjinerie,” sê Gupta.
Nie net trekkers nie
Mahindra stel egter nie net trekkers aan die plaaslike mark bekend nie, maar ook toerusting wat deur die maatskappy se filiale vervaardig word. Dit sluit onder meer produkte van Sampo Rosenlew uit Finland, Mitsubishi Mahindra Agri Machinery uit Japan, en Hisarlar en Erkunt uit Turkye in. Die maatskappy het reeds sewe trekkerhandelaars reg oor Suid-Afrika en Namibië aangewys ter ondersteuning van die plaaslike bedryf.
Mahindra het reeds ’n monteringsaanleg, swaarvoertuigmonteringsaanleg, ’n nasionale pakhuis en ’n tegniese opleidingsentrum in Suid-Afrika opgerig ten einde sy ondersteuningsbasis aan sy handelaars te verstewig. Die sewe nuwe Mahindra-handelaars is in Randfontein, Brits, Strand, Nigel, Malelane, Groblersdal (met ’n satelliet-tak in Middelburg) en Windhoek in Namibië.
“Ons het reeds ’n hele aantal langtermynbeleggings in Suid-Afrika gemaak en ons sien daarna uit om ons produk en diensaanbod in die toekoms verder uit te brei,” sê Gupta.
