Boere van die Suid-Kaap beproef 'n ingevoerde eg wat kan help met stoppelbestuur en plaagbestryding.
Mnr. Christo Visser, bemarker: meganisasie by Sentraal-Suid Koöperasie (SSK) op Swellendam, sê boere het die afgelope paar jaar ná planttyd baie probleme ondervind met insekte soos krimpvarkies, slakke en duisendpote, wat in bondels stoppels oorleef en veral kanola erg benadeel.
'n Groep boere wat verlede jaar die Farm Progress-skou in die Kanadese provinsie Saskatchewan besoek het, het die potensiaal van die Brandt Contour Commander raakgesien. Sedertdien het SSK drie van die werktuie ingevoer. Visser sê die stoppeleg gaan aangewend word om ná oestyd en voor planttyd die strooi en kaf wat deur die stropers agtergelaat is, egalig te versprei sodat die insekte nie in die dik lae strooi kan skuil en oorsomer nie. Die planter sal ook nie verstop of blokkeer nie omdat die strooi meer egalig versprei is.
Visser sê verder die stoppel-eg kan gedurende die werksaksie ook die ontkieming van onkruid en oesreste stimuleer wat voorplant-onkruidbespuitings meer doeltreffend sal maak aangesien die onkruidsade en oesreste meer egalig versprei is.
"Met ons besoek verlede jaar aan Kanada was daar geen plaas in die provinsie Saskatchewan waar daar nie soortgelyke werktuie gebruik is nie. SSK het op die Brandt-werktuig besluit omdat dit kontoere kan volg en die kleinste eg wat beskikbaar is, 'n werkwydte van 15m (50 voet) het, terwyl ander vervaardigers by 23m (70 voet) begin en tot wydtes van 30m (90 voet) vervaardig."
