Die nuwe, kragtige snymasjien, die Cane Thumper, herinner aan 'n selfaangedrewe grassnyer gekruis met 'n snymasjien met lemme wat oormekaar beweeg.
Nortmec en New Holland SA, die landbouwerktuigarm van CSE Equipment, is aangestel as die alleenverspreider van dié nuwe suikerrietsnyer wat in Duitsland vervaardig word. Die snyer is ontwerp om die oes van suikerriet deels te meganiseer.
Dit het 'n dubbellem-snystelsel wat die oesproses versnel, maar terselfdertyd baie veilig werk, sê mnr. Tony Sinclair, hoofbestuurder van die onderneming.
" 'n Belangrike voordeel van die werktuig is dat dit suikerriet wat omgeval het ewe doeltreffend kan sny en dat dit teen
skuins hellings (tot 55%aaneen en 80%oor kort ente) doeltreffend kan werk," sê hy.
"Vir die tradisionele manier van oes van suikerriet, volgens waar dit afgekap word, is geskooldewerkers,hoofsaaklik mans,nodig en dit vereis baie inspanning en energie. Met die nuwe werktuig kan ongeskoolde werkers, ook vroue, suikerriet doeltreffend met betreklik min inspanning oes.
"Hoewel diewerktuig nie werkers in die suikerrietbedryf vervang nie, is dit moontlik om as gevolg van die gedeeltelike meganisering vinniger te oes as op die tradisionele manier," sê hy.
Ander voordele van die snyer is dat dit min vibreer, maklik hanteer en 'n lang werkleeftyd met min onderhoud het. Die
kragtige eenhede word aangedryf deur 'n Agria-enjin wat 5 kW opwek teen 3 600 r/min. Dit werk suinig met brandstof en gebruik sowat 0,6 liter diesel per uur.
Enkel- of dubbelewiele met bande word aanbeveel vir gelyk en golwende landerye. Teen steil hellings en waar suikerriet omgeval het, word swaardiens-metaalwiele met 'n roosterpatroon aanbeveel.
Spesiale bykomstighede, soos 'n uurmeter om werkverrigting te meet en 'n ligeenheid om snags te kan werk, is beskikbaar.
Die stelsel wat die messe aandryf is deel van 'n onderhoudsvrye swaardiens aandrywingstelsel wat in 'n oliebak loop. Die spesiale meseenhede is uiters sterk gebou en klippe en vreemde voorwerpe beskadig dit niemaklik nie.
Die werktuig sny die riete onder skoon af en beskadig nie die plante nie. Die onderhoud bestaan hoofsaaklik uit die vervanging van die messe van tyd tot tyd en min operateursopleiding is nodig.
In voorlopige proewe is gevind dat tot 80 ton riet per dag deur agt werkers gesny kan word. Tot 'n hektaar kan dus tydens 'n werkdag van agt uur gesny word.
Die aanbevole prys vir die werktuig met al die bykomstighede en onderdele wat dit vir ses maande sonder enige ondersteunende diens aan die loop kan hou, is sowat R98 500, maar belangstellendes moet hul naaste verspreider raadpleeg.
Landbouweekblad, 26 Oktober 2007
