New Holland Agriculture het sy ondersteuning van die Volhoubare Innovasieforum as Goue Borg, sowel as deelname aan een van dié gebeurtenis se drie breë paneelsessies aangekondig. Aangebied deur Climate Action, in vennootskap met UNEP en saam met die Doha 2012 Climate Change Conference (COP18), sal die Volhoubare Innovasieforum meer as 500 senior figure uit die besigheidsektor, regerings en NRO’s byeenbring op 6 Desember.
Besprekings sal onder meer handel oor hoe om openbare-privaat-vennootskappe te mobiliseer, die uitdagings van volhoubare verstedeliking met ‘n stygende bevolking, sowel as die jongste vordering in tegnologie en innovasie.
Gaurav Sood, hoof van gewasoplossings by New Holland Fiat Indië, sal as paneellid deelneem aan die derde breë paneelsessie Technology and Innovation: accelerating the green economy, wat sal fokus op die jongste deurbrake in groen tegnologie en innoverings wat deur besighede en nywerhede ontwikkel word. Hy sal meer as 20 jaar se ervaring van die landboubedryf, sy vermoë om landbouneigings te evalueer en toepaslike boerderytegnologie en toerusting te bepaal, sowel as sy kundigheid in biomassa-versamelstelsels na die tafel bring.
Groot uitdaging
Franco Fusignani, New Holland Agriculture se handelsmerkleier, het die volgende te sê: “Klimaatsverandering verteenwoordig een van die grootste uitdagings van ons era, maar dit kan ook gesien word as ‘n geleentheid om ‘n oorgang na lae-koolstof-, hulpbrondoeltreffende, volhoubare landbou te kataliseer.”
New Holland se toewyding tot die omgewing het gelei tot die Clean Energy Leader-strategie, wat in 2006 geloods is om praktiese en toeganklike maniere te soek om die behoeftes van die landboubedryf te versoen met toenemende, dringende oproepe vir aksie om die omgewing te beskerm.
Hierdie strategie het tot groot beleggings in hul eie lae-uitlaatenjintegnologie gelei, in samewerking met sustermaatskappy FPT Industrial, ‘n vervaardiger van kragoordrastelsels. As gevolg hiervan, bied New Holland vandag die wydste reeks Tier 4A-versoenbare produkte in die bedryf, met 33 trekkers en 18 stropers.
Dit het ook gelei tot New Holland se betrokkendheid in die biomassa-bedryf in Europa, Noord-Amerika, Brasilië en Indië, waar dit met leiers in die biomassabedryf saamwerk.
Oorgang na volhoubare ontwikkeling
New Holland Agriculture se deelname aan hierdie belangrike forum is getuie van hul verbintenis om plaaslike boerderygemeenskappe te ondersteun om ‘n gladde oorgang na volhoubare ontwikkeling te verseker, terwyl natuurlike hulpbronne vir toekomstige generasies beskerm word.
New Holland het met landbouprojekte regoor die wêreld gewerk om lande se oorgang na volhoubare, gemeganiseerde boerdery, geïntegreerde innovasie en goeie praktyke glad te laat verloop en doeltreffende oplossings te bied om die gebruik van hulpbronne te optimaliseer en produktiwiteit te verhoog, maar terselfdertyd kostes, brandstofverbruik en uitlaatgasse te sny.
Die korrekte gebruik van die toepaslike masjinerie is baie belangrik in die proses om die meeste van skaars hulpbronne te maak. New Holland het die grootste produkreeks in die bedryf, ondersteun deur ‘n wêreldwye vervaardigings- en R&D-netwerk om pasgemaakte masjiene te verseker vir die verskillende toestande regoor die wêreld – van maklik onderhoubare masjiene met basiese spesifikasies, tot die mees gevorderde, hoëproduktiwiteitstegnologie.
Een hiervan is die TD5-trekker wat by die geleentheid uitgestal gaan word: vir die eerste keer op skou in die Midde-Ooste. Hierdie maklik onderhoubare trekker lewer ‘n kragtige en veelsydige werkverrigting, gekombineer met baie min uitlaatgasse en uitsonderlike brandstofdoeltreffendheid.
Optimaliseer hulpbronne
Meganisasie, gekombineer met die toepaslike boerderytegnieke, kan ‘n groot verskil maak om die meeste uit skaars hulpbronne te kry en grond-, water- en kunsmisgebruik te optimaliseer. New Holland het die kundigheid om boere te help om die doeltreffendste boerderypraktyke vir hul plaaslike toestande aan te neem en die vermoë om kundiges in aanvullende spesialisgebiede in te bring, soos besproeiing- en bewerkingstegnieke.
Bekwame operateurs en dienstegnici is ook uiters belangrik vir ‘n suksesvolle oorgang na meganisasie. New Holland Agriculture beskou opleiding dus as noodsaaklik wanneer landboutoerusting verskaf word.
“Volhoubare gemeganiseerde boerdery is nie net goed vir die omgewing nie,” voeg Franco Fusignani by, “dit maak ook besigheidsin. Wanneer landbou met ‘n langtermynvisie van volhoubare groei benader word, wat daarop gerig is om beskerming te bied teen die skadelike uitwerking van onvanpaste landboupraktyke, is sodanige gesonde landbou goed vir ons besigheid, goed vir die omgewing en goed vir die plaaslike gemeenskap.
"Dit gebruik natuurlike hulpbronne doeltreffend, dra by tot die bewaring van hierdie hulpbronne, is kostedoeltreffend en produktief en lê geleenthede bloots vir verdere ontwikkeling.”
