Trekkerverkope van 377 eenhede in Junie is 11% laer as die 424 eenhede wat in Junie verlede jaar verkoop is.
Mnr. Leon Pretorius, voorsitter van die SA Landboumasjinerie-assosiasie, sê trekkerverkope vir die jaar is tot dusver byna 15% laer as verkope vir dieselfde tydperk verlede jaar.
Stroperverkope in Junie was 36% laer as verkope verlede jaar en is nou 35% laer vir dieselfde tydperk van die vorige jaar.
Pretorius sê ná ’n moeilike tydperk in Mei, toe die aflewering van sekere toerusting geraak is deur die Transnet-staking, kon die meeste verskaffers sommige van die vertraagde aflewerings in Junie afhandel. Die feit dat somergewasse eers later geoes is en die lae mieliepryse knou steeds die mark.
“Boere is nie onder druk om onmiddellik besluite te neem oor aankope nie en ons sal dus eers oor sowat twee of drie maande neigings in dié mark kan vasstel. Ramings oor trekkerverkope vir 2010 in die bedryf bly sowat 5 000 eenhede, ongeveer 10% laer as verkope verlede jaar.”
7 Julie 2010
