Luidens ’n verklaring is die kleinhandeltrekkerverkope van 1 268 eenhede in Oktober 48% ho?r teenoor die 856 eenhede wat in Oktober 2021 verkoop is.
Tot dusver is vanjaar se totale trekkerverkope ongeveer 20% meer as die totale verkope in 2021. Altesaam 34 stropers is in Oktober landwyd verkoop.
Hoewel dit 11 eenhede minder is teenoor die 45 eenhede wat verlede Oktober verkoop is, is 2022 se jaarlikse stroperverkope byna 33% meer teenoor verlede jaar.
Mnr. Tallie Giessing, voorsitter van SAAMA, skryf die goeie verkope toe aan die gunstige begin van die somerreënseisoen, wat volg op beter as verwagte opbrengste van wintergewasse.
“Die verkoopneiging behoort op kort termyn volgehou te word – minstens tot vroeg 2023. Daarna, met die onvermydelike hoër pryse vir toerusting en insetkoste, dui aanvanklike ramings daarop dat verkope behoort te stabiliseer. Toekomstige kommoditeitspryse sal ook ’n belangrike invloed hê op verkope.
“Volgens ramings sal trekkerverkope vir die 2022-kalenderjaar ongeveer 9 000 eenhede wees en stroperverkope 350 eenhede,” sê hy.
Mnr. Anthony Clark van Smalltalkdaily Research, ’n ontleder van onder meer genoteerde voedselmaatskappye, sê die eerste paar maande van 2022 was “lewendig” in die tradisionele kooptydperk voor die einde van die belastingjaar einde Februarie.
"In April het die verkope van kapitaaltoerusting afgeneem. Dit het egter in Mei vinnig herstel as gevolg van voortdurende voorraadtekorte. Verkope sedertdien was sterk met goeie oeste wat gelewer is en vir boere in die somersaaigebied finansi?le sekerheid gebied het voor die nuwe plantseisoen wat tans aan die gang is.
“Daar is hoë verwagtinge van nog ’n goeie landbouseisoen ten spyte van inflasie wat op ’n jaargrondslag, na gelang van die streek, van 50% tot 70% is namate brandstof-, kunsmis- en saadkoste styg.”
