Spuitwerk wat voorheen deur 'n vliegtuig gedoen is, word nou vinnig kafgedraf met 'n ou katoenplukker wat aangepas is om plaagdoders toe te dien. Benewens geld, spaar mnr. JP Kirchner, 'n groenteboer van Groblersdal, ook baie tyd en arbeid met sy ontwerp.
Met die katoenplukker, wat hy in 'n spuitmasjien vir plaagdoder omskep het, kan hy manalleen 30 ha op 'n dag kafdraf.
Was dit nie vir die katoenplukker nie, sou hy sy landerye met 'n vliegtuig moes bespuit.
Met die verandering aan die plukker was daar nie 'n plan om van te werk nie. Dit het dinkwerk, doen en oordoen gekos, maar ná twee maande was die spuitmasjien op die lande.
Mnr. Kirchner het die mandjie van die katoenplukker verwyder en 'n watertenk van 2 500 l in sy plek opgesit. Met die water kan hy 12 ha op 'n slag bespuit voordat hy weer die tenk moet volmaak.
Die spuitbalk — twee staalarms wat 'n kousbalkspuit in posisie hou — is die enigste items wat nie oorspronklik deel van die masjien was nie. Die arms se strekwydte is 18 m en word met die masjien se hidrouliese stelsel beheer. Die balke word hidroulies oopgevou en op en af gestel.
Die spuithoogte kan by die gewas aangepas word. Die balk kan van 0,5 m van die grond af tot 2 m verstel word. Dit beteken dat nie net groente nie, maar ook ander gewasse, soos mielies, daarmee gespuit kan word.
'n Verdere voordeel is dat dit nie nodig is om die arm toe te maak wanneer aan die einde van die akker gedraai word nie — dit word hidroulies oor die draad gelig en só kan die wenakker sommer in dieselfde proses bygekom word.
Die plukker se oorspronklike waaier word gebruik om wind vir die kousbalk te verskaf. Met die kousbalkeffek kan die gif tot onder die groenteplante se blare geblaas word.
28 November 2003
