Na die skerp prysstygings van landboumasjinerie oor die afgelope 18 maande lyk dit asof die prysverandering op ’n jaargrondslag op kort termyn stadig daal.
Dr. Jim Rankin, uitvoerende hoof van Agfacts, sê in Desember 2012 was die prysverandering op ’n jaargrondslag vir alle kategorieë landboumasjinerie (trekkers, stropers, hooi- en voermaaktoerusting asook werktuie) redelik laag met die gemiddelde algemene prysverandering wat met 3% gedaal het.
Die waardevermindering in die waarde van die rand gedurende 2013 en vroeg in 2014 het ’n nadelige uitwerking gehad op die prysveranderinge op 'n jaargrondslag. Sedertdien het die verandering op 'n jaargrondslag in die waarde van die rand versterk. Vir Junie 2014 word die prysverandering vir alle kategorieë landboumasjinerie as 21,4% aangegee terwyl dié syfer vir Julie 2014 op 18,3% staan, wat ’n afwaartse neiging van 3,0% aandui.
Die Suid-Afrikaanse Landboumasjinerie-assosiasie (Salma) se amptelike kleinhandelsverkooppsyfers vir April, Mei en Junie van nuwe trekkers en stropers in Suid-Afrika is nie beskikbaar nie. Volgens Agfacts se skatting is die 590 nuwe trekkers wat in Junie 2014 verkoop is, egter sowat 10,1% minder as die 656 eenhede wat in Junie 2013 van die hand gesit is.
In die drie maande tot Junie vanjaar het 95 nuwe stropers nuwe base gekry teenoor die 110 nuwe stropers wat in die ooreenstemmende tydperk verlede jaar verkoop is. Hierdie syfers verteenwoordig ’n daling van 13,6% in stroperverkope vir die gegewe tydperk.
Volgens skatting sal tussen 6 800 en 7 200 nuwe trekkers (5% tot 10% minder as in 2013) en tussen 320 en 330 nuwe stropers (5% tot 10% minder as in 2013) in 2014 van die hand gesit word, sê Rankin.
