In 1958 het ’n belaaide suikerbeetstroper sowat 4 ton geweeg. In 2020 was dit 36 ton. Die wiellas op die voorste as het van 1,5 ton tot 12,5 ton toegeneem. ’n Olifant, die swaarste landdier, weeg sowat 8 ton, maar ’n souropode, wat 66 miljoen jaar gelede uitgesterf het, het tot meer as 40 ton geweeg.
Hoewel groter werktuie landbouproduktiwiteit verhoog, is wetenskaplikes bekommerd dat dié kolosse die funksionering van grond kan benadeel deur dieper grondlae te verdig.
Prof. Thomas Keller en prof. Dani Or van universiteite in Swede en Switserland skryf in PNAS al het kontakstres op die grondoppervlak min of meer dieselfde gebly gedurende die ontwikkeling van plaaswerktuie, verskuif die stres met swaarder masjiene na dieper grondlae waar dit “veilige perke vir die ekologiese funksionering van die grond” oorskry.
