'n Klompie boere van Vaalwater in Limpopo, wat veteraantrekkers, -voertuie en oudhede versamel, kom vir die afgelope drie jaar bymekaar om hul toerusting saam ten toon te stal. Verlede jaar het bykans 900 mense na dié trekkers, mikro-karre, enjins, huishoudelike items en ploegdemonstrasies kom kyk.
Tydens die fees gaan daar 'n optog deur die dorp gehou word waaraan al die werkende ou voertuie gaan deelneem. 'n Boereorkes sal besoekers vermaak en klein kinders kan in 'n dierekampie plaasdiere voer. Vir die dames sal daar kunsklasse aangebied word.
Die fees word op 7 en 8 Augustus by Vaalwater-rivieroord, 2 km buite die dorp, aangebied. Mnr. Jan Botha, die eienaar van die plaas, is self 'n trekkerversamelaar. Die toegangsfooi is R30 en dié geld sal gebruik word om 'n museum op die plaas in te rig waar versamelaars hul oudhede kan berg en besoekers regoor die jaar daarna kan kom kyk.
Vir meer inligting bel me. Eugene Botha by 084 304 5415 of eugene_botha@msn.com, me. Marie Botha by 082 929 4850, of mnr. Attie Louwrens by 083 236 4387 of ajlouwrens@telkomsa.net.
22 Julie 2009
