Trekkerverkope van 314 eenhede in Mei is byna 35% minder as die 482 eenhede wat in Mei verlede jaar verkoop is, sê mnr. Leon Pretorius, voorsitter van die SA Landboumasjinerie-assosiasie.
Vir die jaar tot dusver is trekkerverkope nou 21% laer as vir die ooreenstemmende tydperk verlede jaar. Stroperverkope was 22% laer as verkope in Mei verlede jaar, maar is steeds 10% hoër vir die jaar tot dusver.
"Ongelukkig het die omvangryke pessimisme wat veroorsaak is deur die wêreldwye ekonomiese onbestendigheid nou versprei na die Suid-Afrikaanse bedryf vir landboumasjinerie. Twee belangrike faktore het op die oomblik 'n ongunstige invloed op die plaaslike mark. Eerstens het dit baie moeilik geword om die aankoop van nuwe toerusting te finansier. Tweedens het baie boere besluit om te "wag en sien" voordat hulle nuwe toerusting aankoop.
"Sodra boere hul somergewasse ge-oes het en begin vasstel het watter masjinerie vereis word vir die volgende seisoen, behoort daar 'n duideliker aanduiding te wees van die rigting vir verkope vir die res van die jaar," sê Pretorius.
4 Junie 2009
