Faktore soos banke se traagheid om kapitaaltoerusting te finansier, moontlike kopers se benadering van wag en sien en die sterk rand wat oespryse afdwing, word as redes aangevoer vir verlede maand se dramatiese afname in trekker- en stroperverkope.
In Julie verlede jaar is 666 trekkers verkoop vergeleke met verlede maand se 450. Dit is ’n daling van 32 % terwyl 51 % minder stropers verkoop is. In Julie verlede jaar is 37 stropers verkoop en in dieselfde maand vanjaar net 18. Op ’n jaar-tot-jaar-grondslag het trekkerverkope met 23,2 % afgeneem en is 7,2 % minder stropers verkoop.
Hoewel boere nou die somergraanoes afgehandel het en gewoonlik in dié stadium oor die koop van nuwe masjinerie besluit, is die verwagting dat die verkope van landboumasjinerie vir die res van die jaar laag sal wees. Talle boere het tydens verlede jaar se gunstige toestande nuwe toerusting aangeskaf.
6 Augustus 2009
