Trekkerverkope van 396 eenhede in Januarie was 18% laer as die 483 eenhede wat in Januarie verlede jaar verkoop is. Stroperverkope vir Januarie was aansienlik laer as verkope verlede Januarie, sê mnr. Leon Pretorius, voorsitter van die Suid-Afrikaanse Landboumasjinerieassosiasie.
Dié maand-tot-maandvergelykings is gebaseer op goeie verkope verlede Januarie, ná die buitengewone verkope in 2008.
Potensiële kopers van landboutoerusting is steeds omsigtig, ten spyte daarvan dat dit ’n kopersmark is. Vraag in die mark bly egter steeds redelik sterk. Klimaatstoestande in die meeste van die somergewasgebiede is redelik goed.
Uit die ander fundamentele aspekte wat die mark beïnvloed, het oespryse oor die afgelope maande aansienlik afgeneem, maar dit wil voorkom asof bankfinansiering effens toegankliker is.
Volgens ramings in die bedryf behoort trekkerverkope vanjaar sowat 5 000 eenhede te wees, sowat 10% laer as verlede jaar.
4 Februarie 2010
