Met 'n voertuig wat kan ry waar dit vir 'n bakkie moeilik is en wat toegerus is sodat 'n mens vinnig en maklik dooierus kan neem, het 'n vindingryke probleemdierjagter van die Vrystaat vir homself sy taak aansienlik makliker gemaak.
Toe hy probleme ondervind om op moeilik begaanbare terrein met sy bakkie te ry, het 'n vierwielmotorfiets die beste oplossing gebied, sê mnr. Nick van Zyl, jagter van Libertas in die Vrystaat.
Van Zyl sê hoewel dié motorfiets ook nadele het, soos dat die jagter heeltemal alleen is, het dit meer voordele. Die voertuig is klein en kan makliker in die veld met 'n net gekamoefleer word. Wanneer hy met sy motorfiets langs 'n katbos stilhou, smelt hy by die natuur in.
Een van die probleme wat hy moes oorkom, is dat die motorfiets nie 'n dooierus het wanneer hy skiet nie. Daarvoor het hy 'n pyp gebuig sodat dit aan die handvatsels van die motorfiets kan vasbout. Dit is baie stewig en presies reg vir vinnig skiet wanneer dit nodig is.
'n Ander probleem op 'n motorfiets is dat 'n mens nie in die rondte kan draai wanneer jy daarop sit nie. Om dit te oorkom, het Van Zyl 'n stoel ontwerp wat aan 'n klamp aan die agterkant van die motorfiets geheg word.
Die stoel draai in die rondte en het 'n eie dooierus sodat die jagter vinnig kan draai en in enige rigting skiet. Wanneer die jagter wil ry, slaan hy bloot die stoel op.
Van Zyl sê hy het baie sukses met die stoel aan die motorfiets. Dit is maklik hanteerbaar, stabiel wanneer hy moet skiet en hy is nou baie meer beweeglik as met 'n bakkie.
Batterye vir die jaglig, die roepapparaat en 'n luidspreker daarvoor is in 'n kissie agterop die fiets. Die kamoefleernet word langs die kissie vasgemaak wanneer die jagter ry.
"As 'n mens ry, sien jy dikwels 'n jakkals naby jou. Dan moet jy vinnig reageer. Dis waar die dooierus handig te pas kom. Die jaglig is reeds op die geweer en al wat nodig is, is om vinnig stil te hou, die geweer op die dooierus neer te sit en te skiet."
16 Junie 2006
