'n Afgeleefde Ford Fairlane en 'n ou motorfiets wat in onbruik geraak het, het dié boer geïnspireer om 'n nuttige plaaswerktuig te bou wat 'n paar ander manne met 'n seer hart begeer.
Die ou Ford Fairlane het êrens in 'n skuur gestaan — een van daardie goed wat 'n mens nie weet waarom jy dit bêre nie, maar ook nie kans sien om dit weg te gooi nie. Die 750 cm3-padfiets was piekfyn, maar is selde gebruik.
Op 'n dag het die gedagte ontstaan om dié twee in 'n meer bruikbare plaaswerktuig te kombineer, vertel mnr. Tonie Stols van Mooiplaas, Delareyville.
Sowat 20 dae later — waarvan die meeste kopkraptyd was — kon hy die eerste toetsdraaie op die werf maak met 'n spoggerige vierwielmotorfiets.
Van die Ford is die ewenaar en voorveerstelsel met stuurmeganisme in 'n nuwe onderstel verenig. Hierdie kombinasie het die adrenalien laat koers kry, want dit sou die eerste vierwielmotorfiets wees waarvan die sporing perfek by sanderige plaaspaadjies aangepas is.
Volgens Stols was die aandrywing ietwat van 'n probleem omdat die motorfiets kettingaandrywing het. Die ratkas van 'n swaardiens-voerkerwer wat ook daar rondgelê het, was die antwoord om die kettingaandrywing aan die een kant in die rigting van die dryfas te verander.
Dié fiets stuur miskien bietjie swaarder as 'n gewone vierwielfiets, maar dit het 'n kleiner draaisirkel as 'n gewone voertuig. 'n Elektriese waaier is vóór die lugverkoelde enjin gemonteer vir gebruik wanneer daar byvoorbeeld stadig op 'n wenakker gery word. Die fiets het 'n topsnelheid van 80 km/h met baie krag en die laairuim kan maklik 300 kg kunsmis hou.
Die enigste uitgawe verbonde aan die maak van die vierwielfiets was twee velle staalplaat vir die laaibak en twee agterligte, wat in totaal sowat R1 200 beloop het.
23 Januarie 2004
