Milkwood Dairy en Woodlands Dairy se aansoek om appèl teen ‘n beslissing is gister deur die Mededingingsappèlhof verwerp.
Dít is die jongste gebeurtenis in die voortslepende saak oor moontlike oortredings van die Wet op Mededinging (Wet 89 van 1998) deur sewe suiwelverwerkers. Op 26 Augustus vanjaar het die Mededingingsappèlhof ‘n gedeelte van ‘n besluit, wat op 17 Maart deur die Mededingingstribunaal gemaak is, ter syde gelê en met ‘n nuwe bevel vervang.
Indien die verwerkers se aansoek om appèl sou slaag, sou hul in die Hooggeregshof teen die besluit van 17 Maart kon appelleer. Die Mededingingsappèlhof het op 26 Augustus beslis dat die klagtes teen Milkwood en Woodlands nie geskrap mag word nie. Dit het ook beslis dat die Mededingingskommissie se lasgewing, waarmee inligting van Woodlands bekom is, onregmatig was.
Die kommissie mag gevolglik nie die betrokke inligting by hul ondersoek insluit nie. Alle dokumente wat op dié wyse bekom is, moes aan Woodlands terugbesorg word. Milkwood het ‘n soortgelyke versoek gerig, maar dit is van die hand gewys. Teen die einde van verlede jaar het Clover en Ladismith Kaas ‘n klagte by die Mededingingstribunaal ingedien dat die Mededingingskommissie se klagte oor die verwerkers nie binne die wetlike tydperk ingedien is nie.
Dié poging om aanklagtes laat vaar te kry is eers deur die tribunaal verwerp en die gevolglike appèl deur die Mededingingsappèlhof. Hierdie verwerkers se aansoek is om appèl op die Appèlhof uitspraak is ook verwerp. Dit ten spyte het hul steeds ‘n appèlaansoek by die Hooggeregshof ingedien.
Lees ook:
8 Desember 2009
