Die Sagtevrugte-ontwikkelingskamer het R1,5 miljoen van die Wes-Kaapse departement van landbou ontvang om ‘n SEB-projek af te skop en mnr. Gerrit van Rensburg, dié provinsie se minister van landbou, meen ander bedrywe kan by die ontwikkelingskamer wat bemagtiging aangaan.
Die projek beoog om 600 ha vrugtebome in die Wes-Kaap te vestig teen ‘n koste van R64 miljoen oor die volgende vyf jaar. Die eerste 52 ha sal vanjaar gevestig word met die hulp van die landboudepartement se fondse.
Daar sal na verwagting 400 000 vrugte tot ‘n waarde van R1,383 miljard gedurende die beplande vrugteboorde se leeftyd geproduseer word en sowat 700 mense sal permanente werk kry. Nóg sowat 700 seisoenale werkers sal ook voordeel trek.
Die projek is ‘n gesamentlike onderneming tussen nuwelingboere, wat grond en arbeid verskaf, die ontwikkelingskamer, wat plantmateriaal, administratiewe dienste en mentorskap aanbied, en die Wes-Kaapse departement van landbou, wat finansiële steun verskaf. Die departement sal ook met infrastruktuur vir besproeiing en grondvoorbereiding help.
Van Rensburg het tydens die opening van die projek in Ceres ander bedrywe uitgedaag om die sagtevrugtebedryf se voorbeeld te volg wat bemagtiging en hervorming aangaan. “Ons het voedselsekuriteit sowel as transformasie in Suid-Afrika nodig. Ons kan nie die een ten koste van die ander geniet nie en dié projek bewys dat dit moontlik is om albei doelwitte suksesvol te bereik.”
Mnr. Trevor Abrahams, voorsitter van die Sagtevrugte-ontwikkelingskamer, sê daar wag baie werk op die betrokke nuwelingboere. “Nuwe boere sal uit hul gemaksones moet kom en by bedryfsorganisasies aansluit. Dit is die enigste manier om suksesvol te leer.” Mnr. Anton Rabe, hoof uitvoerende beampte van die ontwikkelingskamer, sê daar is nie ‘n bloudruk vir dié soort projek nie, maar voeg by dat sy organisasie toegewyd is om dit ‘n sukses te maak.
25 Augustus 2009
