Dit is die tiende jaar wat Morgenster ’n prys vir een van sy olyfolies by die L’Orciolo d’Oro-kompetisie in Italië verower.
Morgenster Landgoed buite Somerset-Wes het vanjaar weer in die Italiaanse L’Orciolo d’Oro-kompetisie ’n prys vir een van sy olyfolies verower. Dit is die tiende jaar wat hy dié soort erkenning in die kompetisie gekry het.
Die Morgenster Ekstra Suiwer Olyfolie vir die 2009-oes het ’n prys van “eersteklas-gehalte” in die kategorie vir mediumvrugtige olies opgeraap. Dié olie is ’n vermenging van 10 verskillende olyfkultivars wat hul oorsprong van die suide tot die noorde van Italië het.
Morgenster was die eerste Suid-Afrikaanse produsent wat in dié kompetisie ’n prys vir sy olyfolie in 1999 gekry het.
22 Julie 2009
