'n Nuwe melkkoöperasie is pas in die Suid-Kaap gestig. Die Eden Melkprodusente-koöperasie se voorrangsaak is om sy produsente in 'n posisie te plaas om beter pryse vir hul melk te beding, sê mnr. Louwtjie van Dyk, die nuwe voorsitter.
Dié produsente-koöperasie sal hom beywer om verhoudinge tussen die melkprodusente en -kopers te verbeter en om aanvaarbaarder pryse vir produksiemiddele te beding.
Melk sal aan Ladismith Kaas gelewer word en onderhandelinge oor leweringskontrakte sal waarskynlik binnekort met dié maatskappy begin.
Die meeste van die sowat 25 lede wat reeds by die nuwe koöperasie ingeskryf is, lewer reeds hul melk aan Ladismith Kaas, sê Van Dyk.
Mnr. Koos Theron, hoof van Samelko op Stellenbosch, sal aanvanklik die administrasie van die koöperasie behartig totdat daar moontlik in die toekoms 'n kantoor op Riversdal geopen word. Tans word gepoog om alle koste, waaronder administrasiekoste, so laag moontlik te hou om dit vir die lede so bekostigbaar moontlik te hou.
Theron sê ál Samelko se lede is kontraktueel aan Parmalat verbind om hul melk aan hom te lewer. Daar sal dus geen van Samelko se lede aan die Eden Melkprodusente-koöperasie behoort nie.
Ná die stigtingsvergadering op 19 Julie is die nuwe naam aan die Registrateur van Koöperasies gestuur. Die registrasie daarvan behoort egter net 'n formaliteit te wees en Theron hoop dat die naam binne die volgende maand of so finaal geregistreer sal wees.
Van Dyk sê groot verwagtinge word vir die nuwe koöperasie gestel. "As dit suksesvol funksioneer, kan dit as 'n model vir soortgelyke koöperasies in ander streke dien."
2 September 2005
