Onderstrominge in die merinobedryf en tussen lede van Merino SA is ‘n bron van kommer en is ‘n kwessie wat met omsigtigheid hanteer sal word, sê mnr. Theo Delport, voorsitter van Merino SA.
Deport het verlede week tydens die genootskap se jaarvergadering op Middelburg in ‘n klaarblyklike verwysing na die geskil tussen Konsortium en BKB gesê dat “geen persoon of persoonlike en selfsugtige wense teen die vooruitgang van die Merinoras opgeweeg sal word nie – selfs al moet ‘n paar lede ongelukkig voel.”
Hy het die versekering gegee dat hy die situasie met groot omsigtigheid sal hanteer en “eerlik en opreg” teenoor al die partye sal optree sou die kwessie na die oppervlakte kom. Delport het ook verwys na aanvalle van lede op die raad van Merino SA se sogenaamde onbetrokkenheid by teling.
“Daar is selfs gesê dat ons ruggraatloos voorkom en geen doelwitte in dié opsig het nie. ” Om dié rede is ‘n subkomitee saamgestel wat bestaan uit boere, raadslede en skaap- en wolraadgewers. Die komitee het ‘n ondersoek na al die prulfoute gedoen en die nodige veranderinge aanbeveel om alle onsekerhede wat mag bestaan het, uit die weg te ruim.
Mnr. Danie Vorster, hoofbestuurder van Merino SA, het in sy jaarverslag gesê dat die genootskap nou 291 geregistreerde lede het. Dit is vyf lede minder as ‘n jaar gelede. Op die 51 ramveilings waarvan uitslae ontvang is, is 2 920 ramme teen ‘n gemiddelde prys van R4 617 verkoop. Omset het met R13,5 miljoen (5,7%) gedaal en die gemiddelde prys was 7% laer as die vorige jaar.
Die vierjaarlikse internasionale Merino-konferensie word aanstaande jaar van 3 tot 5 Mei in Frankryk gehou word. ‘n Toer word beplan en Spanje, Portugal, Duitsland en Roemenië sal onder meer besoek word.
17 September 2009
