Die beste lid van ’n veediefstaleenheid in die Wes-Kaap kom van Oudtshoorn, wat ook die setel vir die beste veediefstaleenheid in dié provinsie is. Agri Wes-Kaap het die eenheid en sr.insp. Fasie de Kock (’n lid van dié eenheid), op sy jaarlikse kongres by Goudini Spa vir hul harde werk geprys.
De Kock sê ondersoekbeamptes in veediefstaleenhede dra ’n swaar las, maar goeie verhoudings met die boerdery- en landelike gemeenskap is van deurslaggewende belang. “Omdat dit moeilike ondersoekwerk is, moet jy toegewyd wees en bereid wees om die ekstra myl saam met die gemeenskap te stap. Ek glo dat my menseverhoudinge my diens van ander onderskei. Ek los nie sake op nie, maar poog om oplossings vir ons kliënte se probleme te kry,” sê hy.
Dit is die sesde keer dat ’n lid van ’n Wes-Kaapse veediefstaleenheid vereer word en die tweede keer in vier jaar dat Oudtshoorn se eenheid dié prys wen.
Op die meegaande foto verskyn (voor) me. Amanda Tsukulweana, me. Josephine Hartzenberg, sr. insp. Fasie de Kock, sr. insp. Wynand Lombard en me. Lindie Magudu. Agter is kapt. Ike Olieslager, sr. insp. Taylor Falake, sr. insp. Koos van der Berg en sr. insp. "Geelslang" Swart. Die foto is verskaf.
11 Augustus 2009
