Die Pretoria-skou het 70 jaar gelede die lig gesien met net handelsuitstallings en 125 beeste op die skou. Vanjaar sal daar sowat 200 uitstallings en 5 000 skoudiere wees by die Tshwane Events Cente, waar die skou plaasvind.
Die skou se landbou-afdeling skop op 20 Augustus af terwyl die algemene skou van 28 Augustus tot 6 September sal duur. Die landbouprogram is in twee afdelings ingedeel. Gedurende die week tot 27 Augustus vind die streekskampioenskapsbyeenkomste vir ryperdklasse in Gauteng plaas. Dit word gevolg deur die kwalifiserende ronde vir die Internasionale Alzu-wêreldbeker vir skouspring.
Die veeteeltskou kom op 28 Augustus op dreef. “Die Pinzgauer-beestelers gaan hul nasionale kampioene aanwys en moet beslis ondersteun word. Belangstelling in dié beesras groei steeds en sowat 150 inskrywings van 25 telers word verwag,” sê mnr. Wim du Toit, hoof uitvoerende beampte van die skou.Nuwe diererasse wat hul debuut op vanjaar se skou maak, is die Hugenoot (’n vleisbeesras), Percherons en Clydesdale-trekperde en Savanna-bokke. Daar sal ook ’n vertoning deur emoes wees.
Die jaarlikse karkaskompetisie vir Gauteng, as deel van die Land Bank en Samic se nasionale karkaskompetisie, vind plaas en die Nasionale Landboubemarkingsraad sal sy beste prestasiegetoetste vleisbul aanwys.
29 Julie 2009
