Beoordelaars moet vandeesweek altesaam 2 163 jongwyne, 10% meer as verlede jaar, bekyk, ruik en proe om te bepaal wie vanjaar die gesogte Genl. Smuts-trofee, vir die beste jongwyn in die land, gaan huis toe neem. Altesaam 17 SA Kampioentrofeë en die Pietman Hugo-trofee vir die kelder met die hoogste punte in vyf kategorieë, is ook op die spel.
“Dis ongelooflik! Ek is oortuig die groter hoeveelheid inskrywings is omdat mense so opgewonde is oor die oesjaar. Almal met wie ek praat beskou dit as ’n uitstekende wynmaakjaar,” sê mnr. Charles Hopkins, voorsitter van die Suid-Afrikaanse Nasionale Wynskouvereniging. Volgens Hopkins het die aantal kelders wat inskryf ook met 13% toegeneem. Die SA Jongwynskou is die oudste en grootste wynkompetisie in Suid-Afrika.
Chenin onttroon Sauvignon blanc
Die afdelings vir Shiraz en Chenin blanc het die meeste inskrywings (178 elk) gelok. Cabernet Sauvignon (153 inskrywings) en Sauvignon blanc (147 inskrywings) is kort op dié kultivars se hakke.
“Shiraz en Sauvignon blanc was tradisioneel ons grootste klasse, maar Chenin blanc het Sauvignon blanc nou verbygesteek. Dit bewys daar is beslis ’n oplewing in Chenin blanc in Suid-Afrika, maar kelders is vanjaar ook opgewonde oor die gehalte van Chenin blanc en daarom het hulle meer wyne in die kategorie ingeskryf.”
Die wyne word deur spesialispanele met sewe gekwalifiseerde wynbeoordelaars in elk van die klasse beoordeel. ’n Agste leerlingbeoordelaar dien ook op die paneel en gee aan opkomende wynproeërs die kans om hul vaardighede te slyp. Hul puntetoekennings word egter nie by die finale tellings ingereken nie.
Produksieskou
Die SA Jongwynskou het ontstaan in ’n tyd toe min produsente verpakte wyn onder hul eie handelsname verkoop het. Daar was dus nie ’n behoefte aan ’n “bottelskou” nie, maar wynboere kon tenkmonsters inskryf. Daar is deesdae selfs ’n kategorie vir ongefilterde wyn. “Dis uit en uit ’n produksie-skou tussen die kelders,” sê Hopkins.
“Vir die ouens wat die groot toekennings wen is daar wel bemarkingswaarde.” Die wenners word op 21 Augustus by die Augrabies-valle naby Upington aangekondig. Die gala-aandete word deur die Oranje-Vaal-wynstreek aangebied.
Besoek www.youngwineshow.co.za vir meer inligting.
