Plase moet bestuur word, kinders moet grootgemaak word, kinders trou en ouers word begrawe. Op ’n sekere ouderdom begin tyd saak maak.
Daarom sit ek gedurende pres. Cyril Rampahosa se staatsrede eerder in die donker eetkamer saam met my jongste laaitie en bespreek die fyner detail van grootbekgeelvis in die Richtersveld vang.
Toe kom die belangrike nuwe skuiwe in sy rugbyspan op skool onder die loep. ’n Beter besteding van tyd kry jy nie. Ongelukkig het almal nie die luukse om hulself só van die ongemaklike werklikheid af te sny nie. Die moeilikheid kom na hulle toe. Elke dag. Vra maar die boere en ander vee-eienaars in die weste van KwaZulu-Natal.
