Boerepelle wat op droëland in die Oos-Vrystaat boer, het skoon angstig begin klink oor die week of wat wat hulle oeste nog sou kon uithou voor daar groot skade was.
Toe reën uiteindelik kom, bieg een verlig teenoor my: “Ja nee, kyk, ’n mielie is nou wragtig omtrent twee weke taaier as ’n boer!” Daardie vasbyt is deesdae oral. Beurtkrag kry almal onder. Die skade verskil net.
Daarom konsentreer ’n mens maar net op die dinge hier voor jou — nie té wyd na die kante kyk nie, of jy kan moedeloos raak. En dít help net mooi niemand nie! Vra maar vir Chris Schutte, die kanniedood- uitvoerende hoof van die pluimveemaatskappy Astral Foods.
