Die meesterplan vir landbou en landbouverwerking is in die afgelope tyd druk bespreek, ook die verskillende interpretasies wat landbou-organisasies daaraan gee. Van die kritiek is dat dit te vaag is en te veel op transformasie konsentreer met te min konkrete aksieplanne, en beleidsdoelwitte wat moeilik meetbaar is.
Die hulpbronne wat gebruik of begroot is om dit uit te voer, is na baie se mening onvoldoende en die staat het hom glad nie daartoe verbind om spesifieke hulpbronne of geld daarvoor te begroot nie. Suid-Afrikaanse uitvoerverdienste is sowat 52% van die bruto produksiewaarde van die landbou.
Dit het die afgelope paar jaar stewig gegroei en die landbou een van die min sektore in die ekonomie gemaak wat kon groei. Die groei in produksie in randwaarde was 162% oor die periode (sien grafiek 1).
