Wêreldwyd het voedselpryse in Maart met meer as 13% binne net ’n maand gestyg. Dit is tans op die hoogste vlak nóg. Volgens die Voedsel-en-landbou-organisasie (VLO) het voedselpryse die afgelope jaar met sowat 32% gestyg.
Die pryse word in Amerikaanse dollar gemonitor. Sake het veral drasties versleg vir lande wat netto invoerders van landbou- en voedselprodukte is, wat meestal in die groep laerinkomstelande val wie se geldeenheid teen die dollar verswak het. Daar word al hoe meer berig oor toenemende honger in baie ontwikkelende lande (waarvan baie Suid-Afrika se noordelike bure is).
Daar is na raming reeds sowat een uit drie mense wat ondervoed en honger is. Die verslegtende toestand skep weer ’n teelaarde vir hernude maatskaplike onrus in baie lande. In Suid-Afrika dui die jongste voedselinflasiesyfer ’n 6,7%-styging op ’n jaargrondslag.
