Onpadwaardige en ongelisensieerde voertuie; voertuie wat sommer in die middel van die straat stop om te gesels (dit sluit polisievoertuie in); parkering aan die verkeerde kant van die straat; roekelose bestuur; en dronkbestuur veral vanaf Vrydagmiddae af is ’n algemene prentjie.
Daar is in elk geval gewoonlik niemand wat bloedtoetse kan doen nie, al word die oortreder gevang. Die Padverkeer-bestuurskorporasie reik jaarliks ’n omvattende verslag uit wat omtrent elke denkbare faset van die land se padverkeer dek.
Daar is selfs statistieke oor die geslag en ras van padslagoffers, plus ’n swetterjoel van die oorsake van ongelukke, soos verbysteek oor ’n wit streep. Alkohol is betrokke in 17% van die noodlottige ongelukke. Dit is duidelik dat die bohaai wat gemaak word oor ongelukke gedurende feestye nie die ware prentjie gee nie.
