Die SA Kaasfees skop op Vrydag, 28 April, op Sandringham by Stellenbosch af. Oudergewoonte stel dié fees ’n indrukwekkende verskeidenheid kaas en produkte soos wyn, konfyt, vars vrugte, inheemse tee en eksotiese drankies ten toon.
Die lys van bedrywighede om oud en jonk besig te hou sluit kaasproe en -koop by die Checkers Kaas-emporium en Food Market in, en besoekers kan skouers skuur met kaasmakers van heinde en verre in die Agri-Expo Cheesery. By die Agri-Expo Kookpot gaan glanspersoonlikhede soos Nataniël en Huisgenoot se Carmen Niehaus na almal se hartelus kook, en meesterbrouers Tim Godfrey en Stephan Lotz wys hul staal met kaas en bier in die Standard Bank Tasting Room.
Die Private Hotel School se sjefs Aviv Liebenberg en Charné Loubser gaan ook wys hoe om met kaas en alternatiewe produkte te kook in die Cape Made Kombuis.
Nog dinge om te doen
Bedrywighede by die SA Kaasfees sluit in:
Die Ladismith-kaaskerfkompetisie;
Die Melkfabriek se suiweldiere;
Neem ’n Landbouweekblad-voorbladfoto;
Die Fynproewerslaan, vir ’n verskeidenheid uitgesoekte geregte, en Spesiale Vrydag-winskopies op 28 April.
Kunstenaars soos Kurt Darren (Vrydag), BlackByrd (Sondag) en ander sal vermaak by die Stellenbosch Vineyards Musiek-gazebo verskaf en besoekers kan die radio-aanbieders Africa Melane (Cape Talk) en Amore Bekker (RSG) ontmoet.
Elke betaalde toegangskaartjie tel ook as ’n inskrywing vir REEDS Motor Group se Wen 'n Bakkie-kompetisie. Kinders is welkom, met pret en vermaak wat hulle ure sal besig hou in die kinderhoekie. 'n Eerste by vanjaar se Kaasfees is die nuwe Fynproewerservaring-pakket, vir ekstra bederf. Asemtoetse vir alkohol en pendeldienste sal ook beskikbaar wees.
Kaartjies is by enige Computicket, Shoprite- of Checkers-winkels teen R160 per persoon per dag beskikbaar. Senior burgers betaal R100 en kinders 13 jaar en jonger kry gratis toegang. Geen kaartjies sal by die hekke verkoop word nie. Die feestye is 10:00 tot 18:00 daagliks.
Kontak Agri-Expo op tel 021 975 4440 of admin@agriexpo.co.za vir meer inligting, of besoek www.cheesefestival.co.za of Computicket. Volg die SA Kaasfees op Twitter, Instagram en Facebook.
