Na aanleiding van ’n waterkonferensie wat deur die TLU SA saamgeroep is, is ’n Nasionale Waterforum op die been gebring. Belanghebbendes van die Regering en betrokkenes in die landbouwaardeketting het die konferensie bygewoon.
Een van die gevolgtrekkings wat op die konferensie gemaak is, is dat “niks oor water verberg mag word nie en dat die landboubedryf sy eie huis in orde moet kry’’, luidens ’n verklaring van die TLU SA. “Ook die skuldiges aan waterbesoedeling sal deur ’n besondere poging betrek word sodat hulle nie deel van die probleem sal bly nie, maar deel van die oplossing sal word,” sê mnr. Louis Meintjes, ondervoorsitter.
Hy het die volgende crede voorgestel: Ons aanvaar die verantwoordelikheid en die plig om ons grond, plantegroei, dierelewe en alle natuurlike hulpbronne te beskerm en dit te bestuur as erflating vir die volgende geslag.
Die forum se sameroepingskomitee is:
Mnr. Louis Meintjes (TLU SA), me. Annatjie Moolman (Waternavorsingskommissie), mnr. Johan Minnaar (algemene praktisyn), me. Karen Marx (Wessa), me. Marie van der Merwe (Sancu), mnr. Johann Botha (NBU), me. Liesl van der Vyver (Hygrotech) en dr. Chris le Roux.
3 September 2009
