Die uitslae van die 2014 “Shiraz SA Wine Challenge” is onlangs bekend gemaak. Die kompetisie wat deur Shiraz SA aangebied word, het ’n internasionale borgskap van die Franse kuiperymaatskappy, Tonnelerie Berthomieu Ermitage, bekom.
Nadat Wine Magazine destyds sy jaarlikse Shiraz Challenge gestaak het, het Shiraz SA sy eie kompetisie bekend gestel. Dit is vanjaar vir die tweede keer aangebied en die organiseerders het ’n kategorie vir Shiraz-versnitte ingesluit. Die besluit om versnitte deel van die kompetisie te maak, berus daarop dat hierdie wyne ’n groot aanhang geniet en daar so ’n groot verskeidenheid versnitte geproduseer word. “Die primêre doelwit van Shiraz SA is om die beeld van Suid-Afrikaanse Shiraz te bevorder en dit was daarom logies om die variëteit se potensiaal vir gebruik in versnitwyne uit te lig,” aldus voorsitter van Shiraz SA, Edmund Terblanche.
'n Totaal van 191 wyne is ingeskryf en oor ’n periode van drie dae geëvalueer. Die Kaapse wynmeester dr. Andy Roediger het as sameroeper en voorsitter van die paneel beoordelaars opgetree. Die beoordelaars was dit eens dat dit 'n stewige reeks Shiraz-wyne en versnitte was wat oor die algemeen indrukwekkend vertoon het. Die uitblinkers het deurgaans finesse met gekonsentreerde geure gehad en 'n hele aantal van die ouer wyne was na hul mening absoluut skitterend.
Shiraz Top 12 vir 2014
Black Elephant Vintners Amistad Syrah 2012
Boschkloof Louis 57 Syrah 2012
Boschkloof Syrah 2012
Cederberg Shiraz 2011
Fairview Beacon Shiraz 2011
Hartenberg Shiraz 2010
Jordan The Prospector Syrah 2012
KWV Abraham Perold Insignis 2012
KWV The Mentors Shiraz 2012
Oldenburg Syrah 2011
Rickety Bridge Shiraz 2011
Saronsberg Provenance Shiraz 2012
Top 4 Shiraz-versnitte vir 2014:
Boschendal 1685 S & M 2012
Eikendal Charisma 2012
Guardian Peak Summit 2012
Rickety Bridge The Foundation Stone 2012
Dit is die tweede agtereenvolgende jaar dat Boschkloof en KWV elkeen met twee trofeë in die kategorie vir Shiraz huis toe gaan. Rickety Bridge was net so in hul noppies met hul twee trofeë vir Shiraz en hul versnit. Elephant Vintners, Boschendal en Guardian Peak wat vanjaar vir die eerste keer ingeskryf het, was net so breëbors met hul uitslae.
