Die skou is vanjaar vir die eerste keer sedert die covid-19-uitbreking aangebied.
Volgens mnr. Danny Wepener, voorsitter van die Bathurst-landbouvereniging, wat die skou organiseer, moes die skou vanjaar binne drie maande gereël word. Al het die covid-19-regulasies gegeld, was dit ’n reusesukses.
“Verrassend genoeg is daar meer mense deur die hekke as gewoonlik. Ons is nog besig om te tel, maar reken daar was nagenoeg 10 000 mense oor die hele naweek by die skou.”
Die Barthurst-skou is die grootste veeskou in die Oos-Kaap. Dit is amptelik 113 jaar oud, hoewel dit nie-amptelik al 150 jaar aangebied word.
Mnr. Peter Cloete, voorsitter van Agri Oos-Kaap, wat ook die skou bygewoon het, sê die organiseerders kan werklik trots wees daarop om steeds die skou te kan aanbied.
“As ons sien wat in baie plaaslike gemeenskappe gebeur, met skoue, sportklubs en kerke wat doodloop, is dit noodsaaklik om hierdie aan die gang te hou. As julle die skou laat gaan, sal julle dit nooit weer bymekaar kry nie.”
Hy het veral die skou gelukgewens met die uitstekende veeskou wat aangebied is.
Volgens Wepener was die vee-afdeling een van die hoogtepunte van die skou, met uitstekende diere van hoë gehalte wat aangebied is in onder meer die bees- en bokafdeling, asook die pluimvee-afdeling, Nog ’n hoogtepunt was die Woody Cape Wildlife-veiling waarop ’n buffelbul, Sidima, vir die hoogste veilingsprys van R4 miljoen verkoop is.
Daarby kon besoekers die pioniersdorpie besoek, wat volgens Wepener ’n uitsonderlike geskiedkundige hoogtepunt was. Nog ’n hoogtepunt was die Cannabis-uitstalling, ’n baie insiggewende en opvoedkundige uitstalling waar meer geleer kon word oor produksiepraktyke, regulering, verskillende tipes plante en die medisinale waardes daarvan. Die perdeskou was ook soos altyd ’n groot gunsteling onder besoekers.
Wepener sê hy het tydens die inperking tydens gesprekke met mense besef hoe belangrik die skou vir die gemeenskap en die groter area is, en ook vir die erfenis van die gebied. Hy sê die reikwydte van die skou is tot by Port Alfred, Makhanda, Oos-Londen en Gqeberha. Een van die belangrikste aspekte van die skou is dat die jeug meer moet leer oor die landbou.
Wepener sê hoewel die skou gedurende die inperking finansiële probleme ervaar het, het pynappelboere, privat instellings en borge seker gemaak die skou kan voortgaan.
