Twee Boerbok-ooie van die Lukas Burger-stoetery van mnr. Lukas Burger van die plaas Rietfontein, Griekwastad, het met die louere weggestap as die grootkampioen- en reserwegrootkampioenooi op die nasionale ooiskou van die Suid-Afrikaanse Boerbok-telersvereniging.
In die Savanna-afdeling is twee ooie van die Koenie Kotzé-stoetery van mnr. Koenie Kotzé van die plaas Swemkuil, Niekerkshoop, as die grootkampioen- en reserwegrootkampioenooi bekroon. By die Kalahari Reds is ’n ooi van die Van Heerden-stoetery van mnre. Ivan en Malan van Heerden van Bronkhorstspruit as die grootkampioenooi aangewys. ’n Ooi van die Karsten-boerdery, Kanoneiland, met mnr. Haraldo Smith as die stoeterybestuurder, is as die reserwegrootkampioen aangewys.
Volgens mnr. Hennie Booysen, voorsitter van die Suid-Afrikaanse Boerbok-telersvereniging, was die skou op Willowmore die eerste in sy soort met verskillende klasse en ouderdomsgroepe.
