Volgens die verkoper, mnr. Paul van Vuuren van die V8 Beefmasters-stoetery naby Bray, het hy met ’n baie swaar hart van die bul afskeid geneem. “Hy het die grondslag in ons kudde gelê, maar ons weet hy is in goeie hande.”
Die vyf jaar oue bul is verkoop aan mnr. Handré en mev. Nerina Maree en Richard Aucamp van A&M Beefmasters wat tans in die distrik Vlaklaagte wes van Rustenburg boer. Handré sê Hilux is ’n uitsonderlike bul en om die genetika te bekom, is ’n voorreg. “Ons glo die Hilux-teellyn gaan ’n groot impak maak in ons kudde,” het Maree aan Landbouweekblad gesê.
Mnr. John Rafferty, ’n dierewetenskaplike en beoordelaar van lewende hawe, wat ook as raadgewer op die veiling was, sê dit is een van die beste stoetbulle wat hy in ’n lang tyd gesien het. Hy het die bul se besonderhede aangestuur vir mnr. PJ Butler van Texas, een van die voorste beoordelaars ter wêreld, wat die bul op grond van sy mediumraam, bespiering en korrektheid bestempel het as een van die beste Beefmaster-bulle wat hy nog gesien het.
Rafferty sê die Beefmaster-ras het oor die afgelope dekade vinnig veld gewen onder stoet- en kommersiële telers. “Dis vir my vanjaar opmerklik dat die duurste bulle op produksieveilings dikwels deur kommersiële telers gekoop word. Die waardering vir die ras uit die kommersiële sektor is baie hoog.”
Die veiling wat op Vryburg gehou is, het lewendige belagstelling gelok met 80 bulle en 50 vroulike diere wat te koop aangebied is. Die afslaer was mnr. André Kock van André Kock & Seun.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
