“Ons het ’n geleentheid gesien om vir die eerste keer ’n veiling van dragtige verse aan te bied,” het mnr. Charl Meyer, lewendehawebemarker by Vleissentraal, by die afgelope geleentheid van die Melkprodusente-organisasie op Alexandrië gesê.
“Daar is nie ander dele van die land wat ’n soortgelyke veiling aanbied nie. Dit sal uniek in die Oos-Kaap aangebied word.”
Die veiling is op 1 Junie by die Gamtoos Ferrie-hotel naby Jeffreysbaai in die Oos-Kaap.
Dit sal die enigste veiling tans wees waar melkbeesrasse soos Friese/Holsteins, Jerseys en ander melkrasse aangebied sal word op ’n oop veiling. Dit sal aan melkboere die geleentheid gee om markverwante pryse vir hul verse te kry.
Volgens Meyer is daar vanweë die huidige goeie melkpryse ’n goeie vraag na dragtige melkverse en daarom verwag hy goeie pryse. Die verse sal hoofsaaklik van die Oos- en Suid-Kaap afkomstig wees.
Hy sê weens die beperkte tyd sal dit moeilik wees om genoeg dragtige verse vir vanjaar se veiling aan te bied en daarom sal daar ook nie-dragtige verse aangebied word.
Die beplanning is om oor twee jaar ’n melkbulveiling aan te bied aangesien daar tans ook nie veilings vir bulle van melkrasse in Suid-Afrika aangebied word nie. Ook hier kan boere goeie pryse behaal, soortgelyk aan wat vir vleisbeesbulle betaal word.
Meyer sê boere wat belang stel om van hul verse aan te bied of wat nog inligting oor die veiling benodig, kan Vleissentraal kontak by 066 214 4291.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
