Die veiling is vanjaar die eerste keer by die Botaniese Tuin by Graaff-Reinet in die Oos-Kaap aangebied.
Volgens mnr. Gert Jordaan, BKB se afslaer vir die veiling, het Kouga Dohnes baie eenvormige ramme op die veiling aangebied en is hulle daarvoor vergoed. “Dit is lekker om te sien dat nuwe verkopers goed presteer op die nasionale veiling. Ek is opgewonde om te sien wat hulle volgende jaar bring.”
Die ram is verkoop aan ’n groep telers, wat mnre. Boeta en Jurie Wessels van Weska Dohnes, Wynand du Toit van Suidplaas Dohnes en John Morris van Terra Vino Dohnes (Universiteit Stellenbosch) insluit.
Die tweede hoogste prys van R80 000 is betaal vir ’n ram van Twee Neefs Dohnes van mnre. Gawie van Zyl en Steyn Steenekamp, wat verkoop is aan mnr. Jaco Wessels van Kroonstad.
Altesaam 25 ramme is teen gemiddeld R29 480 op die veiling verkoop.
Volgens Jordaan het die veiling onder omstandighede redelik goed gedoen. “Ons weet die rammark in Suid-Afrika in geheel is vir die seisoen onder druk. Daar is vandag goeie ramme vir goeie pryse verkoop en ek sien dit steeds as ’n veiling waar kommersiële boere ook die geleentheid het om baie goeie teelmateriaal vir bekostigbare pryse te koop.”
Dr. Kobus Delport, bestuurder van Dohne Merinotelersgenootskap, het beaam dat dit ’n taamlike goeie veiling was in die lig van die huidige markomstandighede. “Die pryse was baie realisties in vergelyking met wat die mark vir ons voorspel het. Ons is baie tevrede, en ek dink die veiling was goed georganiseer.”
Die genootskap het die aand voor die veiling sy jaarlikse funksie aangebied, met mnr. Boeta Wessels van Weska Dohnes wat vir die tweede agtereenvolgende jaar aangewys is as die Dohne Merino’s se bobaasteler.
Mnr. Koos Vosloo, die genootskap se voorsitter, is aangewys as die Dohne Merino’s se persoonlikheid van die jaar.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
