’n Deel van ’n Vrystaatse plaas word deesdae ’n towerland van liggies in ’n poging om watervoëls en dié wat snags rondvlieg, te red.
Dié projek van die Trust vir Bedreigde Natuurlewe (TBN) in samewerking met Eskom, is ’n nuwe benadering om flikkerende LED-ligte te gebruik om te voorkom dat voëls teen hoogspanningsdrade vasvlieg.
Dié toestel wat van ’n sonpaneel voorsien is om ’n liggie heelnag te laat flikker, is ’n samestelling van twee tegnieke om voëls van kragdrade te verwilder.
Mnr. Constant Hoogstad, ’n projekbestuurder van die TBN, sê die trust en Eskom het in hulle pogings die afgelope jare om die dood van diere as gevolg van Eskom-strukture te voorkom, vasgestel dat veral watervoëls soos flaminke teen kragdrade vasvlieg.
“Dit is interessant dat dié voëlspesies voor sonop, teen sononder en in die nag vlieg wanneer die kragdrade moeilik sigbaar is. Die groot flamink, Phoenicopterus roseus, en die kleiner spesie Phoenicopterus minor word reg oor Suid-Afrika en in die oostelike dele van Suider-Afrika aangetref en word as bykans bedreigde spesies beskou,” sê hy.
Die aanvangsprojek is op die plaas Rooihoogte, sowat 30 km van Kroonstad af.
Die afgelope drie jaar het meer as 50 flaminke hulle te pletter gevlieg teen die kragdrade op die plaas wat reeds duidelik gemerk is om die sigbaarheid daarvan te verhoog.
“Dit was vir die vennootskap van die TBN en Eskom ’n geskiedkundige dag toe die wêreld se eerste sonkrag-LED-toestel aan ’n hoogspanningslyn op die plaas aangebring is,” sê Hoogstad. “Ons is baie optimisties oor die verwagte sukses van dié tegnologie. Afhangende van die sukses hiervan, sal die projek in ander dele van die land ingestel word.”
Hoogstad het ’n beroep op grondeienaars gedoen om enige inligting oor gevalle waar die dierelewe bedreig word, veral weens strukture soos dié van Eskom, aan hom by constanth@ewt.org.za deur te gee.
Byskrif: ’n Geskiedkundige oomblik toe die eerste LED-toestel aan kragdrade op die plaas Rooihoogte deur Eskom-werkers aangebring is. Foto: Constant Hoogstad.
Onder: Die LED-sonkrag-toestel, wat snags flikker en bedags aan die kragdrade kan rondswaai om vlieënde voëls te waarsku. Foto: Constant Hoogstad.
