"Die Regering dink nuut oor regulering in die landbou en ek het geen twyfel dat die regte besluit geneem is om die heffing weer in te stel nie."
Die statutêre heffing vir die rooivleisbedryf is in November verlede jaar goedgekeur.
Schutte het op die Wes-Kaapse RPO se jaarvergadering by die Hoër Landbouskool Boland gesê dit, tesame met die vrywillige heffing wat ook van toepassing is, is noodsaaklik vir die voortbestaan van die RPO.
Die heffing word vir onder meer produsente-skakeling en die oordrag van inligting, navorsing, invoermonitering, die instelling van 'n opspoorbaarheidstelsel en die bestryding van veediefstal en -siektes gebruik.
Volgens Schutte het die invoer van beesvleis van meer as 21 000 metrieke ton in 2000 tot 16 700 metrieke ton in 2005 gedaal. Dié van skaapvleis het in dieselfde tyd van 51 000 metrieke ton tot 19 500 metrieke ton gedaal.
"Rooivleisprodusente kan tevrede wees met die ad valorem-invoertarief van 40 % en daar word ernstig beding om dié tarief te behou".
"Ook die Namibiese besluit — 'n politieke besluit — dat vir elke lewende skaap wat van daar na Suid-Afrika ingevoer word, twee skaapkarkasse ook ingevoer moet word, is reg bestuur. Daardie karkasse word in die kleinhandel as 'n produk van Namibië verkoop."
Volgens Schutte verg die smokkelary van speenkalwers vanuit Botswana aandag. "Dié smokkelary word vererger omdat die boere van Botswana slegs R3/kg ontvang, maar heelwat meer in Suid-Afrika kan kry. Tans is die wettige invoer van speenkalwers uit Botswana nog nie goedgekeur nie."
3 Maart 2006
