Ondanks die moeilike en uitdagende landbou-omstandighede wat tans landwyd heers, het die Suidwes Groep steeds uitstekend presteer. Só het dr. Herman van Schalkwyk (groep hoof-uitvoerende beampte) tydens ‘n glansgeleentheid by Sun City gesê waar Suidwes Landbou aan sy top-klante erkenning gegee het.
By die geleentheid het die voorsitter van die direksie, mnr. Hansie Viljoen, gesê: “Sonder die ondersteuning van produsente kan die Suidwes Groep nie die hoogtes bereik soos dit tans die geval is nie. Dit is tiperend van ons boeregemeenskap om in moeilike omstandighede saam te staan.”
Viljoen het beklemtoon dat ‘n boer, met ‘n maatskappy soos Suidwes Landbou as sy vennoot, ‘n krisisjaar soos 2016 tromp-op kan loop. Suidwes het spesiale droogtehulp-finansieringsprodukte vir produsente beskikbaar gestel en verder deel lede almal in die Suidwes-aansporingskortingskema.
Welvaart en waardeVan Schalkwyk het ook benadruk dat by Suidwes voortdurend gestreef word om welvaart en waarde vir sy lede, klante en personeel te skep deur die toepassing en uitbreiding van die maatskappy se unieke besigheidsmodel op plaaslike, nasionale en internasionale vlak.
“Die maatskappy se nuwe trefreël, ‘Uit die lede, vir die lede’, beklemtoon die hoë premie wat Suidwes Landbou plaas op samewerking tussen klante, aandeelhouers en personeel,” het Van Schalkwyk gesê.
Foto-byskrif: Lede van die Suidwes-direksie en die bestuurspan in ‘n gesellige luim. Van links is mnre. Deon Badenhorst, Anton Botha, Theo Delport, Frans Marx, George Potgieter, Gert Malherbe, Hansie Viljoen, Debbie Engelbrecht, Jannie Louw, Piet Delport, dr. Herman van Schalkwyk, Thean Geldenhuys, Patrick Nelissen, Thys Neethling, me. Bridgitte Mathews en Anton Jordaan. Foto verskaf
