Die Wes-Kaapse departement van omgewingsake en ontwikkelingsbeplanning het moderne hommeltuie aangeskaf vir omgewingswaarneming uit die lug en is nou besig om sy Groen Skerpioene op te lei in die hantering daarvan.
“Namate druk op ons natuurlike ekostelsels toeneem, raak die verpligting op ons om die toepassing van omgewingswetgewing te monitor en af te dwing al hoe belangriker,” sê mnr. Anton Bredell, provinsiale minister van plaaslike regering, omgewingsake en ontwikkelingsbeplanning. “Terselfdertyd werk ons met beperkinge in ons begrotings en ook beperkte mannekrag. Daarom moet ons nuwe tegnologie, soos hommeltuie, aangryp om ons optrede te verskerp.”
Hy sê die departement het R250 000 belê om nege lede van die Groen Skerpioene op te lei om afstandgerigte vlieënierslisensies te bekom ten einde hommeltuie wettig te gebruik in hul veldwerk. Al nege vlieëniers het die intensiewe opleiding van drie weke suksesvol voltooi en is gereed om die tegnologie te benut.
Mnr. Ayub Mohamed, ’n hoofdirekteur in die departement, sê die hommeltuie skep nuwe, doeltreffende manier om produktiwiteit te verbeter. Dit kan help met ondersoeke en die insameling van inligting deur beeldmateriaal uit die lug. Dit kan help omdat klagtes oor beweerde onwettige bedrywighede bevestig moet word deur inspeksies ter plaatse. Die hommeltuie kan ook nuttig wees in gebiede wat nie begaanbaar te voet is nie.
Beeldmateriaal uit hommeltuie kan gebruik word om die omvang van onwettige bedrywighede of die erns van omgewingsbesoedeling te bepaal omdat dit dikwels moeiliker is om foto’s en beeldmateriaal op grondvlak te gebruik om die omvang te bepaal. Die lugfoto’s bied ’n holistiese prentjie van die omgewing.
Mohamed wys daarop dat hommeltuie voordelig is wat veiligheid en die vermyding van risiko’s betref in byvoorbeeld gebiede waar maatskaplike onrus voorkom of gevaarlike en ontoeganklike gebiede. Die amptenare kan op ’n veilige afstand bly en beeldmateriaal kry sonder om hulself in gevaar te stel.
Die departement het tot twee DJI Mavic Air 2S-hommeltuie aangeskaf en hulle is al ingespan om die onwettige verwydering van inheemse plante in die Kaapse Wynland te bestry.
