“Ek probeer my varkboerdery so eenvoudig moontlik hou. Toe ek die bestuur daarvan by my pa oorgeneem het, was dit ’n alles-in-, alles-uit-stelsel wat min papierwerk en aantekeninge gehad het. Nou het ek twee verskillende varkboerdery-eenhede. Die een is ’n ou ontwerp wat elke dag met die hand skoongemaak moet word. Die tweede eenheid het volledig outomatiese behuisingstelsels.
“Al my varke is nou op die databasis van die PigCHAMP-varkbestuursagteware. Elke teelsog se identifikasienommer word in PigCHAMP aangeteken. Gekoppel aan hierdie nommer is inligting oor byvoorbeeld haar ouderdom, haar aantal parings tot op hede, die grootte van haar werpsels en die geskiedenis van haar gesondheid.
“Dié digitale aantekeninge laat my toe om dinge te sien soos watter sôe na die geboortehuis moet gaan, wanneer en met watter entstowwe die varke ingeënt moet word, en wanneer varkies gespeen moet word.
