Dié 150 kW-sonkragstelsel met ’n 180 kW-batterystelsel het hom R3,5 miljoen uit die sak gejaag, maar hy bespaar op lang termyn en dit is beslis ’n belegging in sy boerdery, vertel hy.
Linde het vyf hoenderhokke met tot 40 000 hoenders elk en het onlangs nóg drie hokke met 150 000 hoenders by sy boerdery gevoeg. Sy Eskom-rekening was minstens R50 000 per maand.
“Met Eskom, as ek ’n bystandeenheid en kabels moes insit met ’n groter transformator – as hulle dit sou toelaat – sou dit my minstens R2 miljoen gekos het. Tydens beurtkrag het die kragopwekker ons sowat R150 000 per maand aan diesel gekos. Ander onkostes het ook weggehardloop soos wanneer die krag afgaan moet ek na die ander plase ry en spilpunte aan gaan sit.
