Mnr. Justin Chadwick, uitvoerende hoof van die Suider-Afrikaanse Sitruskwekersvereniging, skryf in sy weeklikse nuusbrief dat daar heelparty redes is vir die sloering. Omdat die vloede in Durban met die openbare vakansiedae in April saamgeval het, het baie sitruskwekers besluit om oesaktiwiteite tot verlede week uit te stel.
Gewelddadige betogings in die Oos-Kaap het ook sitruspaktyd verlore laat gaan.
Waar daar verlede jaar teen week 18 reeds 3,9 miljoen 15 kg-kartonhouers pomelo’s verskeep is, is vanjaar nog net 2,8 miljoen kartonhouers verskeep. Altesaam 1,9 miljoen kartonhouers mandaryne en 7,3 miljoen kartonhouers suurlemoene is in 2021 aan die einde van week 18 verskeep, teenoor 1,3 miljoen kartonhouers mandaryne en 4,8 miljoen kartonhouers suurlemoene vanjaar.
Chadwick meen sitruspryse wat nie juis gestyg het nie terwyl koste toeneem, kan ook veroorsaak dat sitruskwekers marginale vrugte gaan terughou.
Volgens hom sal daar in die volgende paar weke meer inligting wees, veral omdat daar berigte is dat meer vragmotors in die hawe aankom.
Chadwick skryf dat sitruskwekers die vereniging gestig het om deur navorsing toegang tot nuwe markte te kry en te behou, en te verseker dat die markte ten beste bedien word.
Deesdae ervaar die sitrusbedryf heelwat marktoegangprobleme. Dit sluit in druk op sy vermoë om verpakte vrugte by en deur die hawe en op skepe te kry, die beskikbaarheid van hawetoerusting en verskepingsgeleenthede, en vragkoste wat die hoogte inskiet.
