Te danke aan uitstekende rekordhouding weet ons dat die eerste appel, ‘n Wijnappel, in die Kaapse Kompanjiestuin op 17 April 1662 gepluk is. Dié gebeurtenis was die begin van wat vandag ’n R6 miljard-vrugtebedryf uitmaak.
Tru-Cape Vrugtebemarking, wat die grootste verspreider van Suid-Afrikaanse appels en pere is, vier vandag dié dag met ’n middagete, praatjie en boomplanting in Grabouw. ’n Winter Saffron-peerboom, gekweek uit ’n snysel van die oudste lewende peerboom in die Kompanjiestuin, word aangeplant in Tru-Cape se Erfenisboord op die Oak Valley-landgoed.
Mnr. Henk Griessel, Tru-Cape se bestuurder van gehalteversekering, en mnr. Buks Nel Tru-Cape se kenner van variëteite, sê Jan van Riebeeck verwys in sy dagboek na die historiese dag en sê: “Swaar motreën in die oggend en ’n sterk noordwestelike wind waai vanaf die see. Vandag is die eerste twee ryp Hollandse appels gepluk in die Kompanjie se kwekery-tuin. Hulle kom van twee klein boompies wat nie meer as 1,5 meter hoog is nie. Hierdie soort appels is bekend as ’n Wijnappel.”
