“Die voordeel van onderweg-kouebehandeling van die produkte is dat vrugte varser is wanneer hulle by hul bestemmingsland aankom. Die verandering in die proses laat verskepers toe om die lengte van die seisoen te verleng met verbruikers wat varser vrugte kry,” sê mnr. Jacques du Preez, Hortgro se hoofbestuurder vir handel en markte.
Hy sê die besluit deur die Indiese regering word verwelkom aangesien dit die bedryf toelaat om gehaltevrugte binne ’n kort tyd van Suid-Afrika na Indië te verskeep.
“Met die onderweg-verkoelingsbehandeling prosedure glo ek die verskaffers en Indiese invoerders sal albei bevoordeel word aangesien die vervoertyd aansienlik verminder is.
“Suid-Afrikaanse appels en pere het ’n merkwaardige reaksie van die Indiese verbruikers gekry en ons glo die volumes kan aansienlik toeneem vanweë die aankondiging.”
Hy bedank die departement van landbou, grondhervorming en landelike ontwikkeling, asook die span van die Suid-Afrikaanse hoëkommissaris na Indië vir hulle bydrae in die onderhandelinge.
Markgeleentheid
Dr. Nigel Cook, internasionale tuinboukundige konsultant van Elgin, het op Hortgro se tegniese simposium in Junie gesê Indië is ’n “ooglopende en groot mark” vir die appelbedryf om na te jaag.
“Daar is nou bemarkers wat ’n voet in die deur kry in dié mark. Ek weet Indië is logisties gesproke ’n moeilike mark, maar dis enorm en on-ontgin vir ons. Die Indiërs verbou self baie appels, maar hulle eet ook baie appels. Daar is werk vir ons om te doen in dié mark.”
Du Preez sê skeepsvaart, wat die beskikbaarheid van skepe en die drastiese toename in koste behels, bly ’n kwessie na alle markte.
“Ten spyte daarvan is ons appeluitvoer na Indië tot week 32 vanjaar op met 84% teenoor die ooreenstemmende tydperk verlede jaar en die uitvoer van pere is 28% hoër, al betaal Suid-Afrika baie hoë invoertarriewe.
“Verskeping na Indië verloop relatief goed sover.”
Volgens Hortgro het Suid-Afrika sedert die begin van die 2022 meer as 2,5 miljoen kartonhouers appels en pere na Indië uitgevoer en neem die vraag jaar ná jaar toe.
Indiese verbruikers se keuse val veral op die appelkultivars Royal Gala, Bigbucks en Top Red, en die peerkultivars Packhams, Vemont Beauty en Forelle.
Volgens Du Preez is die bedryf alreeds vir ses jaar besig met die onderhandeling vir die kouebehandeling en is die eerste proefhouers reeds in 2017 gestuur.
Mnr. Wandile Sihlobo, hoofekonoom van Agbiz, het tydens die internasionale varsproduktevereniging (IFPA) se Suidelike Afrika-konferensie in Kaapstad gesê die landbou het ’n enorme behoefte aan nuwe markte. Altesaam 51% van Suid-Afrikaanse landbouprodukte word tans uitgevoer.
Hy beskou Indië, saam met Japan, China, Saoedi-Arabië en Bangladesj as teikenmarkte vir Suid-Afrikaanse landbouers.
